Патишта - одбрани поглавја

Предговор Учебникот „Патишта – одбрани поглавја“ произлезе од потребата на студентите-питомци кои студираат на Воената академија „Генерал Михаило Апостолски“, Скопје, полесно да ја совладаат предметната програма во делот на предавањата и вежбите, и да се стекнат со општи и стручни знаења од доменот на одбрани поглавја од развој на патната инфраструктура полесно да ја совладаат материјата и да се стекнат со општи и стручни знаења од областите: за патната мрежа, класификација на патиштата, експлоатациони показатели во планирање на сообраќајот, патните елементи, одржување итн. Преминот од поглавје на поглавје е едноставен со внимателен пристап на теоријата и практиката, а сѐ со цел учебникот да биде лесно читлив и едноставен за разбирање. Учебникот, исто така, содржи и голем број слики и голем број на табели кои го збогатуваат истиот и придонесуваат подобро да се илустрира концептот на програмските цели и идејата на авторот. Ваквиот пристап на авторот им овозможува на студентите од насоката „Нискоградба во одбранбениот систем“, на Воената академија „Генерал Михаило Апостолски“, Скопје придружна членка на Универзитетот „Гоце Делчев“, Штип на полесен и поедноставен начин да ја разберат материјата што се предава и на полесен и поедноставен начин да се стекнат со неопходните знаења од оваа област. Користам прилика да се заблагодарам на рецензентите на овој учебник: проф. д-р Горан Мијоски и проф. д-р Драге Петрески, за коректните сугестии во подобрување на текстот и графичките прилози како и за моралната поддршка за издавање на овој учебник. Посебна благодарност ќе им должам на сите оние кои по читањето на овој учебник ќе дадат забелешки и сугестии со цел за негово подобрување и усовршување на знаењата од оваа област. „Нашето богатство не ја создаде нашата инфраструктура, туку нашата инфраструктура го создаде нашето богатство“ Џон Кенеди – поранешен претседател на САД „Најдобриот показател за моќта на една држава, претставува нејзината инфраструктура, која еднаш се гради а цел експлоатационен период перманентно се одржува а одржувањето на инфраструктурата претставува нејзино продолжено градење“ редовен професор д-р Александар Главинов