Azərbaycanda Yaşayan St Elevasi̇yasiz Mi̇okard İnfarkti Və Koronar Arteri̇yalarin Çoxdamarli Zədələnməsi̇ Olan Xəstələrdə Xiii (Fxiii) Koagulyasi̇ya Faktorunun Gen Poli̇morfi̇zmi̇

Bu məqalədə Azərbaycanda yaşayan, ST seqmentinin qalxması olmadan miokard infarktı (NSTEMİ) və koronar arteriyaların çoxdamarlı zədələnməsi olan xəstələrdə FXIII geninin polimorfizminin qiymətləndirilməsinin nəticələri təqdim edilmişdir. F13A1 geninin G103T polimorfizminin paylanmasının təhlili ardıcıl şəkildə aparılmışdır: ümumi seçmədə, klinik qruplar arasında (obstruktiv NSTEMİ və qeyri-obstruktiv — MINOCA), həmçinin koronar zədələnmənin xarakteri nəzərə alınmaqla. Ümumi seçmədə (n=200) G/G genotipi üstünlük təşkil etmişdir (69,0%), G/T heterozigot variantının tezliyi 26,5%, T/T homozigot variantının tezliyi isə 4,5% təşkil etmişdir. G allelinin tezliyi 82,25%, T allelinin tezliyi isə 17,75% olmuşdur. Obstruktiv NSTEMİ olan xəstələr qrupunda damar zədələnməsinin artması ilə G/G genotipinin tezliyinin azalması (bir damarlı zədələnmədə 74,5%-dən iki damarlı zədələnmədə 65,1%-ə və üç damarlı zədələnmədə 41,7%-ə qədər) və G/T genotipinin tezliyinin artması (17,6%-dən 30,2%-ə və 58,3%-ə qədər) müşahidə olunmuşdur. MINOCA olan xəstələr qrupunda da oxşar tendensiya qeydə alınmışdır: G/G genotipinin tezliyi azalmış (85,4% → 66,7% → 37,5%), G/T genotipinin tezliyi isə artmışdır (14,6% → 23,3% → 62,5%). F13A1 geninin G103T polimorfizminin NSTEMİ olan xəstələrin kompleks müayinəsinə daxil edilməsi xəstəliyin patogenezinin daha dərindən araşdırılmasına və diaqnostika və müalicədəfərdiləşdirilmiş yanaşmaların formalaşdırılmasına töhfə verə bilər.